पतीचं बँक स्टेटमेंट पत्नीला दिलं; बँकेला दणका

अहमदाबाद: ग्राहकाच्या परवानगीविना खात्याची माहिती त्याच्या पत्नीला दिल्याप्रकरणी ग्राहक तक्रार निवारण मंचानं संबंधित बँकेला जोरदार दणका दिला आहे. ग्राहकाला दहा हजार रुपये देण्यात यावेत, असे आदेश मंचानं बँकेला दिले आहेत. अहमदाबादमधील दिनेश पमनानी यांचे इंडियन ओव्हरसीज बँकेच्या स्थानिक शाखेत खाते आहे. बँकेनं कोणतीही सूचना न देता त्यांच्या खात्याची माहिती पत्नीला दिल्यानं पमनानींनी ग्राहक तक्रार निवारण मंचाकडे तक्रार केली होती. 'पत्नीसोबतचा वाद फॅमिली कोर्टात सुरू आहे. अशा वेळी माझी पत्नी बँक खात्याद्वारे मिळालेली माहिती कोर्टात सादर करू शकते,' असं म्हणणं पमनानींनी मांडलं.६ मे २०१७ रोजी पमनानी यांच्या मोबाइलवर बँकेकडून एसएमएस पाठवण्यात आला होता. त्यांच्या खात्यातील १०३ रुपये कापल्याचा त्यात उल्लेख होता. दोन दिवसांनी त्यांनी बँक अधिकाऱ्यांना याबाबत विचारणा केली होती. त्यावर पत्नीनं तुमचं बँक स्टेटमेंट घेतल्यानं शुल्क आकारण्यात आलं, अशी माहिती देण्यात आली. त्यामुळं पमनानींनी बँकेविरोधात ग्राहक तक्रार निवारण मंचाकडे धाव घेतली होती. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2QjQkna