वृद्धाला वाचवले, पण 'त्याला'च ट्रेनने धडक दिली

मुंबई: रूळ ओलांडणाऱ्या एका वृद्ध प्रवाशाला वाचवायला गेलेल्या गॅंगमॅन विजय मादरे यांनाच एका लोकलने धडक दिल्यामुळे गंभीर जखमी झाले. त्यांच्यावर विले पार्लेच्या कुपर रुग्णालयात उपचार सुरू असून डॉक्टरांनी मादरे यांना दोन वर्ष सक्तीची विश्रांती घेण्याचा सल्ला दिला आहे. शनिवारी सकाळी चर्चगेटला जाणारी दुरान्तो एक्स्प्रेस १० मिनिटांसाठी अंधेरी-जोगेश्वरी स्थानकांच्यादरम्यान थांबली होती. तेव्हा त्यातून एक वृद्ध प्रवासी उतरले आणि कळवा पूलाच्या दिशेने चालू लागले. रूळ ओलांडत असताना ते एकाच दिशेने लोकल येते आहे की नाही हे पाहत होते. पण ती सकाळची सर्वाधिक ट्रॅफिकची वेळ असल्याने, लोकल दोन्ही बाजूनी भरधाव वेगाने येत होत्या. तिथून जवळच रुळ बदलणाऱ्या गॅंगमॅन विजय मादरे यांना लगेच ही गोष्ट लक्षात आली. तेव्हा ते आपलं काम बाजूला ठेवून त्या वृद्ध प्रवाश्याच्या मदतीला गेले.त्यांना रुळांवरून बाजूला नेले आणि सुरक्षित ठिकाणी उभे केले. पण त्यांची मदत करत असताना त्यांचं रुळांवरचं लक्ष मात्र विचलीत झाले. त्यांची मदत करून मागे वळताच वांद्र्याला जाणाऱ्या एक लोकलने त्यांना धडक दिली. ते जागेवरच कोसळले. लोकलच्या मोटरमनने प्रसंगावधावनाने ती लोकल थांबवली. मादरे यांना लोकलमध्ये टाकून लगेच अंधेरीला नेण्यात आले. तिथून कुपर रुग्णालयात हलवण्यात आले. मादरे यांच्या खांद्याला गंभीर दुखापत झाली असून त्यांना जड काम करता येणार नाही असं डॉक्टरांनी सांगितलं आहे. मादरे ५४ वर्षांचे असून त्यांच्या निवृत्तीला सहा वर्षंच उरले आहेत. त्यांना २४ वर्षांचा एक मुलगा असून एक १२ वर्षांची मुलगीही आहे. ज्य वृद्ध प्रवाश्याची मादरेंनी मदत केली ते त्यांची विचारपूस करायलाही रुग्णालयात आले नाहीत अशी खंत त्यांच्या मुलाने व्यक्त केली आहे. तर पश्चिम रेल्वेचे पीआरओ रविंद्र भाकर यांनी मादरे यांच कौतूक केलं आहे. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2zDqe46