'अयोध्येत राम मंदिर होणारच'

म. टा. विशेष प्रतिनिधी, मुंबईभारतीय जनता पक्षास सत्तेवर येण्याची खात्री नव्हती, त्यामुळे ते निवडणुकीपूर्वी आश्वासने देत गेले. आता त्यांची पूर्तता करताना त्याचा ताण प्रशासकीय अधिकाऱ्यांवर पडतो आहे, अशी टिका करतानाच आमचा भगवा फडकणारच, आणि अयोध्येत राम मंदीर होणारच, असे उद्गार शिवसेना पक्षप्रमुख उद्धव ठाकरे यांनी रविवारी काढले. माजी मुख्यमंत्री आणि शिवसेना नेते मनोहर जोशी यांच्या 'प्रशासन' पुस्तकाचे प्रकाशन मुंबईत रविवारी झाले. या प्रकाशन सोहळ्यात उद्धव ठाकरे बोलत होते. आम्ही सत्तेत येणार नाही याची खात्रीच होती, असे वक्तव्य काही दिवसांपूर्वी केंद्रीय मंत्री नितीन गडकरी यांनी केले होते. गडकरी यांच्या वक्तव्याचा धागा पकडून उद्धव ठाकरे यांनी निशाणा साधला. गडकरी यांनाही या कार्यक्रमाचे निमंत्रण होते, मात्र ते काही कारणास्तव उपस्थित राहू शकले नव्हते. यावेळी उद्धव ठाकरे म्हणाले की, आज येथे गडकरी आले नाहीत. त्यांनी काही दिवसांपूर्वी एका कार्यक्रमात बोलताना, केंद्रात आमचे सरकार येणारच नाही अशी आम्हाला खात्री होती असे विधान केले होते. त्यामुळे त्यांनी लोकांना वाटेल तशी आश्वासने दिली होती, असेही सांगितले होते. मात्र आम्ही केवळ आश्वासने देत नाही. आमचा भगवा फडकणारच असून आम्ही मंदिर बांधणारच आहोत, असे उद्धव म्हणाले. आज सरकारने शिर्डी संस्थानकडून मदत घेतली, याठिकाणीही देवच धावून आला मदतीला, असा टोलाही उद्धव यांनी लगावला. माझा राजीनामा घ्या : मनोहर जोशीतत्पूर्वी आपले मनोगत मांडताना मनोहर जोशी म्हणाले की, मला लवकरात लवकर राजकारणातून निवृत्त करा, माझा राजीनामा स्विकारा अशी माझी विनंती आहे. आता मी ८१ वर्षांचा झालो असून या वयात शरीर थकते. माझ्यामागे अनेक नेते असून त्यांना मी रोखून धरणे ठीक नाही, असेही जोशी म्हणाले. निवृत्तीचे वय ठरले पाहिजे, माझा राजीनामा लवकरात लवकर स्वीकारायला हवा. मी गेल्या वर्षीपासून उद्धव ठाकरे यांना मला निवृत्त करा, अशी मागणी करत आहे, असेही जोशी म्हणाले. त्याचा धागा पकडून उद्धव यांनी उपस्थितांनाच जाहीर प्रश्न विचारला. मी सगळ्यांना प्रश्न विचारतो, सरांना निवृत्त करायचे का? मी आता राजीनामा स्वीकारतो, पण उद्या तुम्ही मातोश्रीवर येवून म्हणाल की काहीतरी काम सांगा. तुमची निवृत्त होण्याची वृत्ती नाही. तुम्ही आता ८१ वर्षाचे झाला असलात तरी अजून तुमच्याकडून आम्हाला खूप मार्गदर्शन हवे आहे, असेही उद्धव यांनी नमूद केले. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2FSosSd