सॅनिटरी नॅपकिन निर्मितीसाठी पालिकेची मदत

२२७ यंत्रसामुग्री खरेदी करण्याचा निर्णय खाद्यपदार्थाच्या व्यवसायासाठीही मदत दीड हजार महिलांना रोजगार म. टा. विशेष प्रतिनिधी, मुंबई जेंडर बजेट अंतर्गत महिला व बाल कल्याण योजनेतील पात्र महिलांना स्वयंरोजगारासाठी सॅनिटरी नॅपकिन बनवण्याची यंत्रसामग्री पुरवण्याचा निर्णय महापालिकेने घेतला आहे. प्रत्येक प्रभागात एक याप्रमाणे २२७ यंत्रासाठी अर्थसहाय्य दिले जाणार येणार आहे. त्यामुळे सुमारे एक ते दीड हजार महिलांना रोजगार उपलब्ध होणार आहे. महिला बचत गटातील महिलांना आतापर्यंत घरघंटीसह शिलाई मशीनचे वाटप करण्यात येत होते. स्वयंरोजगारासाठी आता सॅनिटरी नॅपकिन तयार करणारी यंत्रसामुग्री व खाद्यपदार्थाच्या व्यवसायासाठी यंत्रसामुग्रीचा संच पुरवण्यात येणार आहे. बचत गटाने यंत्रसामुग्रीसाठी १०० टक्के रक्कम पुरवठादाराकडे भरल्यानंतर खरेदी किमतीच्या ९५ टक्के रक्कम बचत गटाच्या बँक खात्यात जमा होणार आहे. मात्र यासाठी बचत गटाची महिला बाल कल्याण योजनेंतर्गत २०१५ ते २०१८ मध्ये स्थापना झालेली असणे आवश्यक आहे. बचत गटाच्या मासिक बैठकांच्या नोंदी, व्यवसायासाठी भांडवल घेण्याचे हमीपत्र लिहून देणे आवश्यक आहे. व्यवसायासाठी एकापेक्षा जास्त महिला बचत गट असल्यास संगणकीय सोडत काढून त्यांचा बचत गट निश्‍चित करण्यात येणार आहे. सॅनिटरी नॅपकिन बनवण्यासाठी असलेल्या यंत्राची किंत सुमारे २ लाख ८३ हजार २०० रुपये असून यापैकी २ कोटी ६९ हजार रुपये पालिकेच्या वतीने देण्यात येणार आहेत. त्यामुळे २२७ सॅनिटरी पॅड यंत्रासाठी पालिकेला ६ कोटी १० लाख ७२ हजार रुपये इतका खर्च येणार आहे. खाद्यपदार्थ व्यवसायासाठी फ्रीज, मायक्रो ओव्हन, मिक्सर, कुकरच्या खरेदीसाठी ४८ हजार २४० रुपये खर्च येईल असे अपेक्षित धरण्यात आले आहे. त्यामुळे पालिकेच्यावतीने प्रत्यक महिला बचत गटास ४५ हजार ८२८ रुपये अर्थसहाय्य करण्यात येणार आहे. त्यामुळे २२७ संच उपलब्ध करून देण्यासाठी पालिकेला १ कोटी ४ लाख २ हजार रुपये खर्च येणार असल्याचे नियोजन विभागाकडून सांगण्यात आले. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2rj6vlw