यूपीः बुलंदशहर हिंसेचा दादरी हत्याकांडाशी संबंध?

मेरठ (उत्तर प्रदेश) 'उत्तर प्रदेशातील बुलंदशहरात काल गोहत्येच्या संशयावरुन झालेल्या हिंसक आंदोलनाला वेगळे वळण मिळण्याची शक्यता आहे. जमावाने पोलीस स्टेशनवर केलेल्या हल्ल्यात मृत्युमुखी पडलेले पोलीस अधिकारी सुबोध कुमार सिंह हे दादरीमध्ये झालेल्या मोहम्मद अखलाक लिंचिंग प्रकरणात तपास अधिकारी होते', अशी माहिती समोर आली आहे. २०१५ साली दादरीमध्ये गोमांस ठेवल्याच्या संशयावरून जमावाने मोहम्मद अखलाक आणि त्यांच्या मुलावर घरात घुसून हल्ला चढवला होता. या हल्ल्यात गंभीर जखमी झालेल्या अखलाक यांचा मृत्यू झाला होता. या प्रकरणात पोलीस अधिकारी सुबोध कुमार सिंह हे साक्षीदार होते. त्यांनी पोलीस अधिकारी म्हणून याप्रकरणी महत्वाची भूमिका सुद्धा बजावली होती. आरोपींविरुद्ध आवश्यक पुरावा गोळा केला होता. परंतु, त्यानंतर काही दिवसांतच त्यांची वाराणसीला बदली करण्यात आली होती. २८ सप्टेंबर २०१५ साली बिसाहडा गावात गोमांस ठेवल्याच्या संशयावरून हिंसक जमावाने अखलाक यांना ठेचून मारले होते. त्यानंतर संपूर्ण परिसरात तणाव निर्माण झाला होता. हा सर्व परिसर पोलीस अधिकारी सुबोध कुमार सिंह यांच्या अखत्यारित होता. त्यांनी तपास करायला सुरुवात केली. अनेक आरोपींना अटक केली होती त्यांच्याविरुद्ध आरोपपत्र तयार केले होते. या प्रकरणात सुबोध कुमार हे ७ वे साक्षीदार होते. सुबोध कुमार सिंह हे २८ सप्टेंबर २०१५ ते ९ नोव्हेंबर २०१५ पर्यंत अखलाख लिंचिग प्रकरणात तपास अधिकारी होते, त्यानंतर दुसऱ्या पोलीस अधिकाऱ्याने आरोपपत्र तयार केले होते, अशी माहिती अतिरिक्त पोलीस महासंचालक (कायदा व सुव्यवस्था) आनंद कुमार यांनी दिली. सुबोध कुमार सिंह मूळचे एटाचे रहिवासी होते. मेरठमध्ये त्यांचे घर आहे. परंतु, तीन वर्षाआधी त्यांची गाझियाबादला बदली झाली होती. काल जमावाने केलेल्या हिंसक आंदोलनात त्यांचा गोळी लागून मृत्यू झाला. अखलाक हत्येत साक्षीदार असलेल्या सुबोध कुमार सिंह यांचा गोळी लागून मृत्यू झाल्याने अनेक प्रश्नचिन्ह उपस्थित झाले आहेत. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2FW5aeL