मर्कटलीलांनी थांबवल्या गाड्या

म. टा. खास प्रतिनिधी, मुंबईमध्य रेल्वेवरील दैनंदिन लोकल वाहतूक तांत्रिक कारणांनी वारंवार बिघडत असताना खंडाळा घाटात मात्र मेल आणि एक्स्प्रेस रखडवायला कारणीभूत ठरत होती ती माकडे! खंडाळ्याजवळ मंकी हिल भागात रेल्वे मार्गावर ओव्हरहेड वायरचे खांब आहेत, त्या खांबावर चढून माकडे वायरशी मस्ती करतात आणि त्यातून काही वेळा वीजपुरवठा खंडित होतो आणि गाड्या जागीच थांबतात. या मर्कटलीलांमुळे चढणीच्या मार्गावर गाड्या अडकून पडत असल्याने रेल्वे प्रशासन मेटाकुटीला आले होते. आता मध्य रेल्वेने त्यावर उपाय योजला आहे. या घटना रोखण्यासाठी अशा ओव्हरहेड वायरच्या खांबावर पाच फुटी अॅल्युमिनियमचे आवरण चढवण्याचा निर्णय घेतला आहे. त्यामुळे मर्कटलीलांनी वीजप्रवाह खंडित होण्याचे प्रकार पूर्ण बंद होतील, असा रेल्वेचा दावा आहे. मध्य रेल्वेवर पुणे आणि त्यापुढे जाणाऱ्या मेल, एक्स्प्रेसच्या मार्गात माकडांमुळे वीजप्रवाह खंडित होण्याची समस्या मधूनच भेडसावते. महिनाभरात किमान तीन वेळा तरी याप्रकारे वीजपुरवठा बंद पडल्याने मेल, एक्स्प्रेस जागीच उभ्या राहतात. या ठिकाणी वीजप्रवाह सुरू केला तरीही चढणीच्या मार्गामुळे थांबलेल्या गाड्या लगेचच सुरू होत नाहीत. त्यासाठी मेल, एक्स्प्रेसच्या मागील बाजूने अन्य इंजिनांची जोड देऊन त्या पुढे नेण्यात येतात. याला पुश पूल तंत्र म्हणून ओळखले जाते. चढणीच्या भागात गाड्यांचा वेग राखण्यासाठी पुश पूल तंत्र अवलंबले जाते. या खांबांवर पाच फुटी अॅल्युमिनियमचे आवरण बसवण्याचे ठरले आहे. या गोलाकार आवरणातून माकडे खांबावर वरच्या दिशेने जाऊ शकतात. पण वरच्या भागातील वीजप्रवाहाकडे जाण्यापासून त्यांना रोखल्याने प्रवाह खंडित होत नाही. यापुढे माकडांकडून होणारा त्रास थांबून वाहतुकीत अशा प्रकारचे अडथळे येणार नाहीत, असे मत ज्येष्ठ अधिकारी व्यक्त करत आहेत. माकडांना इजा न पोहचवता...ओव्हरहेड वायरकडील वीजपुरवठा खंडित झाल्यास मंकी हिलजवळ सुमारे दोन ते तीन तास सेवा रखडते. त्या दुरुस्तीसाठी आणि प्रवाह पूर्ववत होण्यासाठी कालावधी लागत असल्याने प्रवाशांना अडचण होते. ती दूर करण्यासाठीच मध्य रेल्वेने गोलाकार आवरणाचे तंत्र विकसित केले आहे. त्यातून माकडांनाही इजा न पोहोचता रेल्वे सेवा सुरळीत राहणार असल्याचे रेल्वे अधिकारी स्पष्ट करतात. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2FToObd