प्रत्येक तालुक्यात दहा ‘मॉडेल स्कूल’

Appasaheb.mali@timesgroup.comTweet:Appasaheb_MTकोल्हापूर : सकाळी एकदा शाळा भरली की, सुटेपर्यंत अध्यापनाचा पॅटर्न ठरलेला. एकानंतर दुसऱ्या विषयातील पाठांची शिकवणी आणि आठवड्यातून एखाद्या दिवशी सायंकाळच्या सत्रात खेळाचा तास. या पारंपरिक चौकटीला छेद देत गगनबावडा तालुक्यात 'ज्ञानयज्ञ' नावाने नवशिक्षणाची संकल्पना रुजू होत आहे. अध्यापन, बौद्धिक खेळ, तरंग वाचनालय, मुक्त वर्ग, प्रयोगशाळा आणि कम्प्युटर लॅबमध्ये एक तास या पद्धतीने रोजची दैनंदिनी तयार केली आहे. प्रत्येक तालुक्यात या पद्धतीने दहा शाळा 'मॉडेल स्कूल' म्हणून विकसित करण्याचे जिल्हा परिषदेच्या प्रशासनाच्या विचाराधीन आहे. 'एकच मिशन, समृद्ध शिक्षण' या संकल्पनेवर आधारित गगनबावडा तालुक्यातील कोदे खुर्द विद्यामंदिरला नवे रूप दिले जात आहे. जिल्हा परिषद सदस्य भगवान पाटील यांनी याकामी पुढाकार घेतला आहे. शाळा आवारातील जागेची आणि वर्गखोल्यांची वैशिष्ट्यपूर्णरीत्या रचना केली जात आहे. डिसेंबर महिन्यामध्ये या शाळेचा लोकार्पण सोहळा होणार आहे. पाटील यांनी लोकसहभागातून हा वेगळा प्रयोग केला आहे. मुख्य कार्यकारी अधिकारी अमन मित्तल यांनी या शाळेला भेट देऊन वेगळ्या संकल्पनेची माहिती घेतली.मुलांचा बौद्धिक विकास, आनंददायी शिक्षण हा प्रमुख उद्देश आहे. ज्ञान आणि मनोरंजनाचा मिलाफ असणार आहे. कोदे खुर्द विद्यामंदिरचे 'मॉडेल स्कूल' म्हणून दिवसभराचे वेळापत्रक बनवले आहे. पहिले दोन तास शिकवणी, त्यानंतर मुक्त वर्गात विद्यार्थ्यांना प्रवेश, ज्ञानरचनावादावर आधारित अध्यापन, स्वयंम अध्ययनाचा समावेश राहील. मुलांच्या बौद्धिकतेला वाव देण्यासाठी बुद्धिबळ खेळ, त्यानंतर मुलांसाठी तयार केलेले झाडाखालील तरंग वाचनालय, तसेच विद्यार्थ्यांनी एक तास प्रयोगशाळेत घालवायचा आहे. कम्प्युटर लॅब, चित्रकला व इतर कलागुणांना प्रोत्साहित करण्यासाठी मुक्त व्यासपीठ ही संकल्पना असेल. विद्यार्थ्यांना श्रमाचे मूल्य, सेंद्रीय शेती पद्धतीची ओळख होईल. या पद्धतीने रचना केली आहे. प्रत्येक विद्यार्थ्याचा कल ओळखून त्याच्यातील सुप्त गुणांना प्रोत्साहित करण्यासाठी शिक्षकांवर जबाबदारी निश्चित केली जाणार आहे. शाळा परिसर हिरवागार बनावा यासाठी वेगवेगळ्या प्रकारच्या वनस्पती, फुलझाडांची जोपासना यावर भर आहे.००००००गगनबावडा तालुक्यात जिल्हा परिषदेच्या मालकीच्या ७३ शाळा आहेत. यामध्ये ३२४७ विद्यार्थी शिकत आहेत. 'ज्ञानयज्ञ' शिक्षण उपक्रमांतर्गत पहिल्या टप्प्यात सर्व शाळांतील विद्यार्थी व शिक्षकांसाठी एकच ड्रेसकोड, समान परिपाठ, ओळखपत्र बनविले आहे. शैक्षणिक उठावला लोकांचा उत्स्फूर्त प्रतिसाद लाभत आहे. पहिल्या टप्प्यात कोदे खुर्द शाळेची अभिनव पद्धतीने उभारणी सुरू आहे. भगवान पाटील, सदस्य, जिल्हा परिषद ००००००जिल्हा परिषदेच्या शाळांची गुणवत्ता, विद्यार्थी पटसंख्या वाढीसाठी प्रयत्न सुरू आहेत. भौतिक सुविधांची उपलब्धता केली जात आहे. विद्यार्थ्यांना आकर्षित करणे व शाळांचा लौकिक वाढविणे हा उद्देश आहे. प्रत्येक तालुक्यातील दहा शाळा 'मॉडेल स्कूल' बनविण्याचा विचार आहे. पदाधिकारी, सदस्य, प्रशासन, शिक्षक या सर्वच घटकांना सोबत घेऊन ही अभिनव संकल्पना साकारू.अमन मित्तल, सीईओ, जिल्हा परिषद०००००० मोबाईल अॅप डाउनलोड करा आणि राहा अपडेट

from Maharashtra Times https://ift.tt/2reialG