फेसबुकवरून गंडा घालणाऱ्याला अटक

म. टा. प्रतिनिधी, पुणेफेसबुकवरून ओळख झाल्यानंतर गुंतवणुकीचे आमिष दाखवून विविध कारणांनी पुण्यातील बांधकाम व्यवसायिकाकडून ४७ लाख रुपये उकळणाऱ्या नायजेरीयन तरुणाला सायबर सेलच्या पोलिसांनी नोएडा येथून अटक केली आहे. हा नायजेरीयन तरुण हा दिल्ली येथील नोएडा विद्यापीठामध्ये एम टेक सॉफ्टवेअरचे शिक्षण घेत असल्याचे समोर आले आहे. त्याने अशा पद्धतीने अनेकांना गंडा घातल्याचे समोर येत आहेत. उसेनु जोशुभा ओगागा ओघेने (वय २६, रा. ग्रोटर नोएडा, उत्तर प्रदेश, मूळ-नायजेरीया) असे अटक केलेल्या व्यक्तीचे नाव आहे. या आरोपीकडून दोन लॅपटॉप, तीन मोबाइल, इतर साहित्य जप्त करण्यात आले आहे. शंकर शेट रस्ता परिसरात राहणारे बांधकाम व्यवसायिक हरनिश शहानपुरीया (वय ५९) यांची या प्रकरणात फसवणूक झाली होती. त्यांची फेसबुकवर अमेरिकेतील एका महिलेसोबत ओळख झाली. त्या महिलेने भारतात रिअल इस्टेटमध्ये गुंतवणूक करायची असल्याचे त्यांना सांगितले. सहा ऑगस्ट २०१८ रोजी त्या महिलेने भारतात आल्याचे सांगितले. तिला दिल्ली विमानतळावर कस्टमने पकडले असून सोडविण्यासाठी पैसे भरायला लावले. विविध कारणे सांगून तक्रादार यांच्याकडून ४७ लाख रुपये उकळले. त्यानंतर ती महिला आली नाही. फसवणूक झाल्याचे समजल्यानंतर शहानपुरीया यांनी सायबर सेलकडे तक्रार दिली होती. याप्रकरणी स्वारगेट पोलिस ठाण्यात गुन्हा दाखल करण्यात आला होता.या गुन्ह्याचा तपास सायबर सेलकडून सुरू होता. तांत्रिक गोष्टीच्या आधारे आरोपीचा माग काढल्यानंतर तो आरोपी नोयडा उत्तर प्रदेश येथे असल्याचे समजले. त्यानुसार पोलिस निरीक्षक संतोष बर्गे, उपनिरीक्षक किरण औटी, अलका जाधव यांच्या पथकाने नोएडा येथून आरोपीला ताब्यात घेतले. त्याच्याकडे चौकशी केल्यानंतर त्याने फेसबुकवर महिलेच्या नावाने बनावट खाते उघडल्याचे आढळले आहे. या खात्यावरून त्याने फसवणूक केल्याचे समोर आले आहे. या आरोपीला स्वारगेट पोलिसांच्या ताब्यात देण्यात आले आहे. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2FSoFVv