क्रौर्याचा कळस! मुंबईत मांजरीला जिवंत जाळलं

मुंबई: मुंबईतील ओशिवरा येथे अनोळखी व्यक्तींनी मांजरीला जिवंत जाळून क्रौर्याची परिसीमा गाठल्याचा प्रकार उघडकीस आला आहे. या प्रकरणी स्थानिक प्राणीप्रेमींनी पोलिसांत तक्रार केली आहे. शवविच्छेदन अहवालानंतर तपास करून कारवाई करण्यात येईल, असं पोलिसांनी सांगितलं. गावदेवी बिल्डिंगच्या मागील बाजूस मांजर मृतावस्थेत आढळली. मांजरीला बांधून, तिला उपाशी ठेवण्यात आलं आणि नंतर जिवंत जाळण्यात आलं, असं सांगण्यात येतं. 'स्थानिकांकडून भटक्या प्राण्यांचा छळ आणि त्यांना निर्दयीपणे मारहाण होत असल्याची माहिती मिळाली होती. अनेक भटक्या प्राण्यांना मारहाण करून त्यांना जायबंदी करून सोडून देण्यात येत असल्याचे प्रकारही घडतात,' असं प्राणीप्रेमी संजीव चोप्रा यांनी सांगितलं. 'मांजर ज्या ठिकाणी जळालेल्या अवस्थेत सापडली, तेथे आसपास कॅमेरेही नाहीत. मांजरीचं शव परळ येथील रुग्णालयात विच्छेदनासाठी पाठवण्यात आलं आहे,' अशी माहिती 'बेजुबान पब्लिक वेलफेअर ट्रस्ट'च्या हेमा चौधरी यांनी दिली. शवविच्छेदन अहवाल प्राप्त झाल्यानंतर संबंधितांवर गुन्हा दाखल करण्यात येईल, असं पोलिसांनी सांगितलं. तर हे विकृत मानसिकतेचे लक्षण आहे, असं मानसोपचारतज्ज्ञांनी सांगितलं. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2FZN8br