पाकच्या फिरकीपटूनं मोडला ८२ वर्षे जुना विक्रम

नवी दिल्ली:अबुधाबीमध्ये सुरू असलेला न्यूझीलंड विरुद्ध पाकिस्तान कसोटी सामना पाकिस्तानबरोबरच क्रिकेटविश्वासाठी ऐतिहासिक ठरला आहे. पाकचा फिरकी गोलंदाज यासिर शाह यानं या सामन्यात झटपट गडी बाद करण्याचा ८२ वर्षे जुना विक्रम मोडीत काढला आहे. ३३व्या कसोटीत २००वा गडी बाद करत शाहनं नव्या विक्रमाला गवसणी घातली आहे.कमीत कमी सामन्यात २०० गडी बाद करण्याचा विक्रम आतापर्यंत ऑस्ट्रेलियाचे गोलंदाज क्लेरी ग्रिमट यांच्या नावावर होता. त्यांनी ३६ कसोटी सामन्यात बळींचे द्विशतक गाठले होते. ग्रिमट यांनी १९३६ साली दक्षिण अफ्रिकेविरुद्ध जोहान्सबर्गमध्ये झालेल्या सामन्यात २००वा बळी टिपला होता. तेव्हापासून तब्बल ८२ वर्षे अबाधित असलेला हा विक्रम यासिरनं आज मोडला.विकेटचं द्विशतक पूर्ण करण्यासाठी त्याला अवघ्या पाच विकेटची गरज होती. न्यूझीलंडविरुद्धच्या सध्या सुरू असलेल्या तिसऱ्या सामन्याच्या पहिल्या डावात त्यानं ३ बळी घेतले. त्यामुळं विक्रमापासून तो केवळ दोन पावलं दूर होता. ही विक्रमी पावलं यासिरनं दुसऱ्या डावात टाकली आणि इतिहास रचला. यासिरच्या आधी पाकिस्तानचा गोलंदाज वकार युनूस यानं कसोटी सामन्यांत २०० बळी घेतले आहेत. मात्र, त्यासाठी तो ३८ सामने खेळला होता.यासिरनं कसोटी क्रिकेटमधील १०० विकेट अवघ्या १७ सामन्यात पूर्ण केले होते. याबाबतीत तो इंग्लंडचे जॉर्ज लेहमन यांच्यानंतर दुसऱ्या क्रमांकावर आहे. लेहमन यांनी १६ कसोटी सामन्यांतच १०० विकेट घेतले होते. झटपट २०० गडी बाद करणाऱ्या गोलंदाजांच्या यादीत भारताचा फिरकीपटू रविचंद्रन अश्विन तिसऱ्या क्रमांकावर आहे. त्यानं ३७ कसोटी सामन्यात हा टप्पा गाठला आहे. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2BUg0xO