बुलंदशहर: मृत पोलिसाचे कुटुंबीय योगींना भेटले

उत्तर प्रदेश: दोन दिवसांपूर्वी बुलंदशहरमध्ये झुंडबळीचा शिकार झालेल्या पोलीस निरिक्षक सुबोध कुमार सिंह यांच्या कुटुंबियांनी आज लखनऊ मुख्यमंत्री योगी आदित्यनाथ यांची भेट घेतली. योगी आदित्यनाथ यांनी सिंह यांच्या कुटुंबियांचे सांत्वन केलं असून त्यांना सर्वतोपरी मदत करण्याचं आश्वासन दिलं आहे. पोलीस निरीक्षक सुबोध कुमार सिंह बुलंदशहर येथील चिंगरावटी पोलीस स्टेशनमध्ये कार्यरत होते. दोन दिवसांपूर्वी गोरक्षक असल्याचा दावा करणाऱ्या झुंडीने त्यांची हत्या केली. सुबोध कुमार सिंह हे दादरीच्या अखलाख हत्याकांडाचा दोन वर्षांपूर्वी तपासही करत होते. पण एकाएकी त्यांची बुलंदशहरला बदली करण्यात आली होती. त्यांच्या हत्येनंतर मुख्यमंत्री बुलंदशहरमध्ये त्यांच्या कुटुंबाला भेटायला आले नाहीत. तसंच सुरुवातीला त्यांना शहीद दर्जाही देण्यात आला नव्हता. यामुळेच चिडून त्यांचं प्रेत स्वीकारण्यास सिंह कुटुंबियांनी नकार दिला होता. पण अखेर पोलिसांनी समजूत काढल्यानंतर त्यांनी प्रेतावर अंत्यसंस्कार केले होते. याच पार्श्वभूमीवर त्यांनी लखनऊत योगी आदित्यनाथ यांची भेट घेतली आहे. योगी आदित्यनाथ यांनी याआधीच कुटुंबियांना ५० लाखांची मदत जाहीर केली होती. त्यासोबतच त्यांचे ३० लाखाचे गृहकर्ज फेडण्याचंही आश्वासन दिलं आहे. सिंह यांच्या मुलांच्या शिक्षणाची जबाबदारीही सरकार घेईल असं आश्वासनही योगी आदित्यनाथ यांनी दिलं आहे. मोबाईल अॅप डाउनलोड करा आणि राहा अपडेट

from Maharashtra Times https://ift.tt/2Qfp09j